‘Oumrah
‘Oumrah li composé de:
1. Ihraam,
2. Tawaaf,
3. Sa’eee entre Safaa et Marwah
4. Halq (rase la tête) ou Taqseer (diminuer cheveux lors la tête longueur ène boute le doigt).
Detail lors ‘Oumrah
Ihraam
La personne ki décide faire ‘Oumrah bizin attache Ihraam. Ihraam pou ‘Oumrah et Hajj li pareil couma takbir tahreemah eté pou namaz. Sans takbir tahreemah ou pas capave commence namaz. Sans Ihraam ou pas capave faire ‘Oumrah et Hajj.
La toile ki ène Haji metté pou Ihraam li composé de deux portions normalement. Ene portion li attache li enbas dans place pantalon ki appelle izaar. Izaar bizin couvert enbas nombril juska genoux inclus. Ene deuxième portion ki li mette lors so le dos dans place chemise ki appelle Ridaa. Avant mette Ihraam, li recommendé tire banne cheveux indésirable couma cheveux en bas le bras, en bas nombril, taille z’ongle et corrige moustache. Après ça de preference faire roussal. Ça roussal-là li sounnat mouakkadah. Si pas capave faire roussal, alors faire wazou. Mais li pas pou gagne même quantité recompense ki li ti pou gagné dans faire roussal. Ça roussal-là li pas ène roussal de tahaarat - li ène roussal de netoyage et de l’hygiène. Donc ça li recommendé pou ène madame ki dans l’état de haiz et nifaas aussi.
Après roussal li mette so linge Ihraam lors li. Li moustahab ki li frotte ène ti parfum lors so le corps mais pas lors linge. Après ça li faire deux rakaat nafil si li dans ène l’heure ki namaz nafil pas makrouh. Au moment ki li pé faire namaz, li couvert so le corps bien et li couvert so la tête aussi parceki li pas encore rentre dans l’état Ihraam.
Ça deux rakaat-là li recommendé et sounnat, li pas obligatoire. Alors si ène personne pas fine capave faire li pou ène raison ou d’autre, alors so Ihraam pou compté.
Banne l’heure ki pas gagne droit faire namaz nafil
Quand l’heure namaz fajar rentré, pas gagne droit faire aukene sounnat ou bien nafil apart les deux sounnat namaz fajar. Ça pas gagne droit-là li resté tanque ki soleil pas fini levé bien et namaz Ishraaq so l’heure pas fini rentré. Quand namaz Ishraaq so l’heure fine rentré, astere capave faire namaz nafil. Coumsa meme pas gagne droit faire aukene namaz nafil quand fini faire namaz Assar tanque ki soleil pas fini couché. Quand soleil pres pou couché aussi, pas gagne droit faire aukene namaz nafil. Coumsa meme l’heure ki soleil li lors coco ki appelle l’heure de zenith et ki d’ordinairement dimoune conne li par l’heure zawaal, pas gagne droit faire aukene nafil. Dans ça banne l’heure-là pas gagne droit faire les deux rakaat ki ena avant Ihraam ni gagne droit faire les deux rakaat ki ena apres tawaaf.
Quand ène personne vine dans l’état Ihraam?
Li important pou nou conné ki ni linge Ihraam, ni lire labbaik et ni l’intention de Ihraam faire ène personne vine dans l’état Ihraam.
Alors quand li vine dans l’état Ihraam?
C’est necque quand ou récite labbaik ensemble avec l’intention de Ihraam ki ou vine ène mouhrim (ène personne dans l’état Ihraam). Donc après avoir accomplir deux rakaat, li découvert so la tête et avec l’intention de Ihraam, li lire talbiyah.
Talbiyah c’est :
لَبَّيْكَ اَللّهُمَّ لَبَّيْكَ لَبَّيْكَ لَا شَرِيْكَ لَكَ لَبَّيْكَ
اِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيْكَ لَكَ
Lab-baik Al-laahoum-ma Lab-baik
Lab-baik laa shareeka laka Lab-baik
In-nal hamda wan–ni’mata laka wal moulk laa sharika lak
C’est necque astere-là ki li vine ène mouhrim. Là, li bizin respecté et observe banne principes et règlements de Ihraam.
Banne kitchoses ki interdits dans Ihraam
1.Banne conversations obscènes, érotiques et banne paroles ki éna trait au sexe; même avec so madame aussi.
2.Faire péché li haraam partout. En état Ihraam li pli haraam.
3.Dispute et querelle.
4.la chasse - Par contre la pêche li autorisé.
5.Montrer, indiquer, guider ou donne l’information à propos kit gibier.
6.Touille ene gibier ou donne kikène pou touiller ou bien mette li dans de l’eau ou dans soleil pou li mort.
7.Servi parfum.
8.Servi savonnette ki ena parfum.
9.Taille z’ongle.
10.Couvert figure.
11.Couvert la tête.
12.Tire cheveux.
13.Mette ène linge ki fine coude lors forme le corps couma pantalon, kourta, chemise, etc.…
14.Mette souliers ou chaussette ki couvert cheville et ça bosse li pied ki nou appelle coude li pied - Donc bizin mette plutôt ène savate ki laisse cheville et ça bosse-là reste découvert.
15. Mette les gants.
Exception pou banne madames
Les nos 10, 11, 13, 14 et 15 pas appliqué pou ène madame. C’est à dire ène madame pas seulement li capave mais li bizin couvert so figure. Li bizin pas découvert so figure divant banne z’hommes étrangers. Astere soit li servi ène l’espèce l’éventail pou cachiette so figure ou soit li mette couma ène casquette lors so la tête et li jette so voile dépi lors ça casquette-là lors so figure en sorte ki li cachiette so figure sans touche so figure.
Contrairement à ene z’homme, ene madame bizin couvert so la tête. Similairement ene madame li autorisé mette linge ki fine coude. Et coumsa même li autorisé mette souliers, chaussette et les gants. Après avoir attache Ihraam, le mouhrim pou faire Tawaaf.
Kitchose ki pas interdit dans Ihraam
1. Prend bain li permette pendant Ihraam mais faudré pas frotte le corps dans ene façon ki cheveux cassé ou bien kit poil déraciné. Bizin frotter légèrement.
2. Assize dans l’ombrage sans ki ça touche figure ou la tête.
3. Attache sacoche dans le rein.
4. Porte bague, montre, bijoux, lunette etc...
5. Mette sourma ki pena parfum.
6. Prise de sang.
7. Arrache le dent.
8. Mette bandage ou bien plaque dans cas oblige.
9. Ene Mouhrim li capave gratte so le corps mais li bizin faire li légèrement pou kit cheveux ou poil pas tombé.
Ki veut dire Tawaaf?
Normalement tawaaf veut dire tourner autour de quelque chose. Ici quand nou dire tawaaf, ça veut dire tourner autour de Ka’bah Shareef.
N.B :- POU PLIS DETAIL CONCERNANT TAWAAF, REFERE OU AU CHAPITRE « DETAIL EN PLIS LORS TAWAAF, IZTIBAA’, SAEE, RAMI ET PASSE LA NUIT DANS MINAA »
Couma faire Tawaaf Ka’bah Shareef?
Avant nou gagne explication lors la façon faire Tawaaf Ka’bah Shareef, li bon ki nou conné ki veut dire IZTIBAA’ et RAMAL. Parceki ena pou observe li dans Tawaaf.
Iztibaa’ veut dire passe Ihraam en bas le bras droite et jette li lors z’épaule gauche, en sorte ki z’épaule droite reste découvert.
Ramal veut dire faire ene ti galop avec tipti tipti pas et bouge tout les deux z’épaules.
Iztibaa’ li sounnat dans tous les sept tours de Tawaaf. Par contre ramal li sounnat dans seulement trois premiers tours.
N.B : Iztibaa’ et Ramal les deux appliqué seulement pou banne zommes. Banne madames zotte exempté de ça.
Couma commence faire Tawaaf
Avant vine en face avec Hajar Aswad, d’abord bizin fini faire iztibaa’ et niyyat pou tawaaf. Après ça le mouhrim li vine en face avec Hajar Aswad et li lève so deux la mains absolument couma li lève so deux la mains dans namaz en récitant :
بِسْمِ اللهِ وَاللهُ اَكْبَرُ وَلِلّهِ الْحَمْدُ وَالصَّلاَةُ وَالسَّلاَمُ عَلى رَسُوْلِ اللهِ
Bismil-laah Wal-laahou Akbar Walil-laahil Hamd
Was-swalaatou was-salaamou ‘alaa Rasoulil-laah
Et ensuite li largue so la main en bas. Après ça li faire Istilaam de Hajar Aswad.
Ki veut dire Istilaam et couma faire Istilaam?
Pose tous les deux plat la main lors Hajar Aswad et pose la bouche au milieu deux plat la main. Si capave faire li dans ça façon-là sans donne kikène difficulté et sans faire kikène du tort, tant mieux - mais si li pas possible, alors necque touche Hajar Aswad avec deux la main et embrasse deux la main. Si pas capave faire li avec deux la main, alors touche li avec ène seule la main, mais de préférence avec la main droite. Mais si ça aussi li difficile, alors servi ène objet, par exemple ène bâton pou touche Hajar Aswad et embrasse bâton-là. Finalement si ça aussi li cause difficulté, alors necque faire signe avec deux plat la main depi loin même et embrasse li.
Veut dire ki d’abord lève deux la main pareille couma li levé pou takbir tahreemah en lisant Bismil-laah Wal-laahou Akbar… et li largue so la main. Après ça li faire Istilaam couma fine expliqué et dans la façon ki li possible et li commence faire Tawaaf Ka’bah Shareef dépi so coté droite avec ramal dans seulement trois premiers tours et avec Iztibaa’ dans tous les sept tours. A chaque fois ki li passe cote Rukn Yamaani li touche li. Mais li pas sounnat pou embrasse li ni li éna pou touche li avec ène objet ni li ena pou faire signe en cas si li pas capave touche li avec so la main.
Coumsa même à chaque fois ki li traverse cote Hajar Aswad li faire istilaam pareille couma ti faire dans commencement, sauf li péna pou lève so la main juska cote z’oreille. Donc li termine les sept tours de Tawaaf par istilaam de Hajar Aswad.
Vine à cote Multazam
Après ça li vine cote Moultazam ki trouve entre la porte Ka’bah et Hajar Aswad. Li attrape Moultazam fort et li colle so l’estomac, et plaque so ventre et so la joue droite. Li étale so deux la main, droite en direction verticale lors muraille la haut so la tête.
deux rakaat Après Tawaaf
Après ça li faire deux rakaat pou Tawaaf dans l’heure ki namaz nafil pas makhrouh. Li alle boire de l’eau Zamzam et li alle faire Sa’ee entre Safaa et Marwah après ça.
Li bon conné ki alle cote Multazam et alle cote puit zamzam pou boire de l’eau zamzam li ene kitchose ki recommandé. Mais si ça li mette la personne dans difficulté dans la foule, alors li capave pas faire li aussi parceki li pas ça important-là. Sans ça aussi so Tawaaf et so ‘Oumrah pou compté.
Sa’ee entre Safaa et Marwa
Après Tawaaf éna pou faire sept tour entre Safaa et Marwah ki appelle Sa’ee entre Safaa et Marwah. Sorte Safaa alle Marwah faire ène tour, et re-retourne Safaa faire deux tours. Veut dire ki le 7ème tour pou termine lors Marwah.
Façon faire Sa’ee
D’abord li monte lors Safaa et faire face avec Ka’bah, li lève la main pou faire dou’aa. Après li dessane et alle vers Marwah. En allant vers Marwah, éna ène boute trajet appelle Milayne Akhdarayne à cote li recommandé traverse li avec ène ti galop au lieu marché. Ça galop-là li recommandé faire li quand arrive lors ça boute ki appelle Milayne Akhdarayne dans chaque tour dans allé-retour, tout les deux. Ça ti galop-là li appliqué pou banne zommes seulement. Banne madames perna pou faire li.
deux rakaat Après Sa’ee
Après les sept tours entre Safaa et Marwah li recommandé faire deux rakaat namaz. A noter ki ça deux rakaat-là aussi bizin faire li dans ène l’heure ki namaz nafil pas makhrouh. Et ça aussi li bon conné ki si pas faire li, perna narien de mauvais là-dans.
Raser ou bien diminuer cheveux
Après ça necque fine reste pou rase la tête ki appelle Halq ou bien diminuer cheveux ki appelle Taqseer. En ceki concerne Taqseer bizin diminuer longueur ène boute le doigt de ¼ la tête au minimum. Si kikène so cheveux li pli courte ki ène boute le doigt, alors diminuer cheveux li pas suffit, li bizin absolument rasé même.
Quant à ène madame, li bizin absolument faire Taqseer - c’est à dire diminué longueur ène boute le doigt.
Quand fini raser ou diminuer cheveux ‘Oumrah fine terminé. Astere la personne népli dans l’état Ihraam. Tout kitchose ki ti empêché acoze Ihraam, astere li permette faire li. Veut dire ki li tire so linge Ihraam et li vine dans l’état normal. Astere li reste dans Makkah. Quand banne jours de Hajj vini, alors li re-attache so Ihraam pou accomplir Hajj.
Récapitulation
‘Oumrah
§ Ihraam + 2 Rakaat
§ Tawaaf Ka’bah + 2 Rakaat
§ Sa’ee entre Safaa et Marwah + 2 Rakaat
§ Raser ou bien diminuer cheveux et retire linge Ihraam.
Alhamdoulil-laah ‘Oumrah fine terminé!!!
N.B :- POU PLI BOUCOU DETAIL LORS ‘OUMRAH, REFERE OU AU CHAPITRE « DETAIL EN PLIS LORS ‘OUMRAH »
